ទស្សនាវដ្ដីស្រាវជ្រាវកម្ពុជាសម្រាប់ការអប់រំ និងស្ទែម បានដាក់ចេញនូវក្រមសីលធម៌នៃបោះពុម្ព ដូចខាងក្រោម៖
- ទស្សនាវដ្ដីស្រាវជ្រាវកម្ពុជាសម្រាប់ការអប់រំ និងស្ទែម លើកកម្ពស់ស្តង់ដាក្រមសីលធម៌បោះពុម្ព និងមានវិធានការណ៍គ្រប់បែបយ៉ាងចំពោះការអនុវត្តមិនល្អលើការបោះពុម្ពផ្សាយអត្ថបទស្រាវជ្រាវ។ អត្ថបទដែលបានបញ្ជូនមកកាន់ ទស្សនាវដ្ដីស្រាវជ្រាវកម្ពុជាសម្រាប់ការអប់រំ និងស្ទែម ត្រូវតែជាអត្ថបទដើម ដែលមិនទាន់បោះពុម្ពផ្សាយពីមុន ឬកំពុងតែទទួលបានការត្រួតពិនិត្យដោយអ្នកជំនាញនៅក្នុងទស្សនាវដ្តីស្រាវជ្រាវផ្សេង និងមិនមានការលួចចំលងស្នាដៃរបស់អ្នកដទៃ។
- អ្នកនិពន្ធទីមួយត្រូវធានាថាអ្នកនិពន្ធទាំងអស់ដែលមាននៅក្នុងអត្ថបទស្រាវជ្រាវនេះឯកភាពទាំងស្រុងលើអត្ថបទដែលត្រូវបោះពុម្ព ព្រមទាំងបង្ហាញថាគ្មានជម្លោះផលប្រយោជន៍ និងត្រូវមានសេចក្តីថ្លែងអំណរគុណដល់ប្រភពមូលនិធិ និងការប្រើប្រាស់រូបភាពកម្មសិទ្ធិបញ្ញាជាដើម។
- ការបញ្ចូលឈ្មោះអ្នកនិពន្ធនៅក្នុងអត្ថបទស្រាវជ្រាវសម្រាប់តែអ្នកដែលបានចូលរួមចំណែកសំខាន់ក្នុងការតាក់តែងរៀបចំ អនុវត្ត និងបកស្រាយរបាយការណ៍នៃការសិក្សាស្រាវជ្រាវ។ អ្នកនិពន្ធទទួលបន្ទុកឆ្លើយឆ្លង ត្រូវធានាឱ្យមានភាពត្រឹមត្រូវក្នុងចំណោមសហអ្នកនិពន្ធ និងប្រាកដថាសហអ្នកនិពន្ធទាំងអស់បានអាន និងឯកភាពបញ្ជូនអត្ថបទមកកាន់ទស្សនាវដ្តីស្រាវជ្រាវកម្ពុជាសម្រាប់ការអប់រំ និងស្ទែម។
- ទស្សនាវដ្ដីស្រាវជ្រាវកម្ពុជាសម្រាប់ការអប់រំ និងស្ទែម ក៏តម្រូវឱ្យមានលិខិតអនុញ្ញាត លិខិតបញ្ជាក់ ឬលិខិតយល់ព្រមពីស្ថាប័ន ឬអ្នកស្ម័គ្រចិត្តចូលរួមក្នុងការស្រាវជ្រាវ បើសិនជាអត្ថបទដែលចេញពីការសិក្សាស្រាវជ្រាវពាក់ព័ន្ធនឹងសារធាតុគីមី នីតិវិធី ឬឧបករណ៍ដែលមានគ្រោះថ្នាក់ខុសពីធម្មតា ឬប្រសិនបើមានការពាក់ព័ន្ធនឹងការប្រើប្រាស់សត្វ ឬមនុស្ស។
- នៅពេលអ្នកនិពន្ធបានពិនិត្យឃើញនូវកំហុសដែលត្រូវការចាំបាច់ក្នុងការកែសម្រួលនៅក្នុងអត្ថបទដែលខ្លួនបានបោះពុម្ពរួចរាល់ អ្នកនិពន្ធមានកាតព្វកិច្ចក្នុងការជូនដំណឹងភ្លាមៗ ដល់និពន្ធនាយកទស្សនាវដ្តីស្រាវជ្រាវកម្ពុជាសម្រាប់ការអប់រំ និងស្ទែមដើម្បីកែសម្រួលអត្ថបទនោះ។
- ទស្សនាវដ្ដីស្រាវជ្រាវកម្ពុជាសម្រាប់ការអប់រំ និងស្ទែម រក្សាសិទ្ធិក្នុងការដកហូតអត្ថបទស្រាវជ្រាវដែលត្រូវបានបោះពុម្ពរួចចេញពីទស្សនាវដ្តីស្រាវជ្រាវនេះ ប្រសិនរកឃើញថាមិនគោរពតាមក្រមសីលធម៌នៃការបោះពុម្ពផ្សាយដូចបានបង្ហាញជូនខាងលើ។